“Shëndeti në shkolla”, ministrja Koçiu: Inspektime për standardet higjieno-sanitare

Inspektoriati Shtetëror Shëndetësor ka kryer 1954 inspektime dhe ri-inspektime në çerdhe, kopshte si dhe në shkollat 9-vjeçare dhe të mesme në të gjithë vendin për përmbushjen e standardeve higjieno-sanitare për të garantuar mbarëvajtjen e duhur të vitit të ri arsimor.

Ministrja e Shëndetësisë dhe Mbrojtjes Sociale, Albana Koçiu ka inspektuar shkollën 9-vjeçare “Qazim Turdiu” në Tiranë për parë nga afër kontrollet e inspektorëve shëndetësor për respektimin e kushteve higjieno-sanitare në institucionet arsimore.

 “Vijojmë me inspektimet për të kontrolluar që plotësojnë kushtet higjieno-sanitare dhe që gjithçka është në rregull,” tha Koçiu.

Ministrja e Shëndetësisë u ndal edhe në kabinetin dentar të kësaj shkolle ku aplikohet programi kombëtar “Shëndeti në shkolla” për depistimin falas dentar dhe të shikimit për fëmijët e grupmoshës 6 – 14 vjeç, ndërsa zgjodhi të flas për programin më të ri atë për depistimin e skoliozës.

 “Ne do të përfshijmë edhe një program të ri për depistimin e skoliozës ku profesorët e edukimit fizik do të kenë rol parësor së bashku me këshillat e mjekëve, për të identifikuar hershëm problematikat me skoliozën. Mjekët këshillojnë që nga mosha 6-14 vjeç të bëhet diagnostikimi i hershëm,” –u shpreh ministrja.

Fokus i inspektimeve nga ISSH është edhe pajisja me vërtetimin  e vaksinave të fëmijëve në sistemin parashkollor dhe ata të cilët hyjnë për herë të parë në shkollë.

LEXONI GJITHASHTU:

• Koçiu në shtëpinë “Zyber Hallulli”, ministrja shoqëron për në shkollë 2 jetimët
• Ligji për Urdhrin e Mjekëve/ Koçiu: Në kodin e ri etik do forcohen masat disiplinore