Shkelën rregulloren, 29 nxënës humbin provimet e Maturës Shtetërore

Rreth 29 maturantë janë përjashtuar nga provimet e Maturës Shtetërore për shkelje të rregullores gjatë tre provimeve të zhvilluara deri më tani.

Sipas Ministrisë së Arsimit dhe Sportit, rastet lidhen kryesisht me përdorimin ose mbajtjen e telefonave celularë dhe mjeteve të tjera të ndaluara në ambientet e testimit, çka ka sjellë anulimin e menjëhershëm të provimit për këta nxënës.

Bilanci u bë publik një ditë përpara zhvillimit të provimit të fundit të Maturës Shtetërore, atij me zgjedhje. Ministrja e Arsimit u bëri thirrje maturantëve të respektojnë rregullat dhe të mos rrezikojnë rezultatin e një viti të tërë për shkak të shkeljeve të rregullores.

Ajo theksoi se procesi do të monitorohet me kujdes dhe se çdo tentativë për kopjim apo përdorim të pajisjeve elektronike do të ndëshkohet me përjashtim.

Provimi i fundit zhvillohet këtë të martë në të gjithë vendin dhe mbyll ciklin e katër testeve të Maturës Shtetërore 2026.

Ministria e Arsimit ka kërkuar nga maturantët të paraqiten në kohë në qendrat e testimit, të kenë me vete dokumentin e identifikimit dhe të respektojnë të gjitha rregullat e përcaktuara për zhvillimin e provimit, në mënyrë që procesi të përfundojë pa incidente.