Shkëlqim Hajdari dorëhiqet nga posti i Kryeinspektorit të Përgjithshëm

Vetëm një ditë pasi njoftoi se ishte finalizuar reforma ligjore në fushën e inspektimeve, e cila prek drejtpërdrejt raportin mes shtetit, biznesit dhe ligjit, Kryeinspektori i Përgjithshëm, Shkëlqim Hajdari, ka dhënë dorëheqjen nga posti që mbante.

Hajdari e mbante këtë post që prej vitit 2016, kur u emërua nga Këshilli i Ministrave ndërsa nuk dihen ende arsyet pse e dha dorëheqjen.

Inspektoriati Qendror (ose Inspektorati i Përgjithshëm) është një institucion shtetëror që ka për detyrë të koordinojë dhe mbikëqyrë sistemin e inspektimeve shtetërore në mbarë vendin, me qëllim zbatimin e ligjit dhe mbrojtjen e interesit publik për qytetarët dhe bizneset nga praktika arbitrare ose jo‑efikase.

Kujtojmë se një ditë më parë, Shkëlqim Hajdari, përmes një reagimi në rrjetet sociale, paralajmëroi se, sipas tij, paligjshmëria, korrupsioni, subjektivizmi dhe barra e padrejtë ndaj biznesit të ndershëm do të marrin fund.

“Bac u kry! Sot jam thellësisht i lumtur për finalizimin e reformës ligjore në fushën e inspektimeve. Rezultatet e kësaj reforme janë pesë masat e para administrative, të shfuqizuara në Komisionin e Shqyrtimit të Ankesave, bazuar në ligj, objektivitet dhe transparencë, me përfaqësues në komision nga Inspektorati i Përgjithshëm, Inspektorati Qendror që ka vendosur gjobën, Ministria e linjës, si dhe përfaqësues nga shoqatat e biznesit. Tani e tutje kujdes, sepse paligjshmëria, korrupsioni, subjektivizmi dhe barra e padrejtë ndaj biznesit të ndershëm do të marrin fund! Falënderim e mirënjohje për të gjithë stafin e Inspektoratit të Përgjithshëm dhe institucionet e tjera të përfshira në këtë reformë të lodhshme e të vështirë, por vizionare, sipas standardeve më të mira të inspektimeve në BE”, shkruante Hajdari.