Shkup| U plagos dhe u rrëmbye rrugës për spital, arratisja spektakolare nga burgu

Në orët e vona të mbrëmjes së të enjtes është arratisur një i burgosur i dënuar me 20 vite burg për vrasje nga burgu më i madh në Maqedoninë e Veriut, Idrizovë.

Korrespondentja e Euronews Albania, Ferikan Iljazi raportoi se i burgosuri ka kërkuar ndihmë mjekësore për shkak të lëndimeve, që sipas burimeve jo zyrtare, ia ka shkaktuar vetes.

Ajo u shpreh se personi është nisur menjëherë me rojet e burgut drejt spitalit, ndërsa ende nuk ka një sqarim se përse ndihma nuk ka ardhur në ambientet e institucionit të vuajtjes së dënimit.

“Gjatë rrugës ua ka prerë rrugën një makinë tjetër me shumë persona të armatosur të cilët kanë marrë të burgosurin nga duart e policisë, por para kësaj i burgosuri ka arritur t’i marrë armën njërit prej policëve dhe nën kërcënimin e armës ka arritur të shpëtojë më lehtësisht. Gjatë kësaj rrëmuje njëri prej policëve është plagosur,” – raportoi Iljazi.

Policia po vijon hetimet dhe kontrollet e brendshme për personat që duhet të mbajnë përgjegjësi për ngjarjen.

LEXONI GJITHASHTU:

• Mbipopullimi në burgje, gazetari zbulon numri e të dënuarve në Shqipëri
• Klosi: U mësuam tani, futen njerëz në burg e pastaj dalin