Shpërthim i fuqishëm në pronën e ish-kryetarit të Komunës së Zubin Potokut

Lajmi është konfirmuar për Radio Evropa e Lirë nga kreu aktual i kësaj komune, Izmir Zeqiri, i cili e dënoi shpërthimin. Zëvendësdrejtori i Policisë së Kosovës për rajonin e Veriut, Veton Elshani, tha për mediat se nga shpërthimi nuk ka pasur viktima apo të lënduar, pasi objekti ishte ende pabanuar. Autoritetet vendase ndodhen në vendngjarje për të zbardhur shkaqet e shpërthimit.

“Ende nuk dihet se çfarë e ka shkaktuar shpërthimin, por njësitet policore janë në vendin e ngjarjes,” tha Elshani për mediat vendase.

Ditë më parë, më 29 shtator, një shpërthim tjetër u raportua në një qytet tjetër të veriut të Kosovës, në Zveçan. Asokohe, policia njoftoi se nuk kishte të lënduar, megjithatë kishte dëme materiale në shtëpizën e pompës së benzinës dhe automjeteve aty pranë. Edhe për këtë incident, ende nuk dihet shkaku i shpërthimit.

LEXONI GJITHASHTU:

• Reagon Kurti pas akuzave të Serbisë për urën në Ibër: Janë paralajmërim për sulm
• Kurti diskuton me QUINT-in për hapjen e urës mbi Ibër