Shpëtim Idrizi: Kandidati që duam për Tiranën, s’jam takuar me Berishën

Kryetari i PDIU-së Shpëtim Idrizi, theksoi se kandidat për kryetar bashkie në Tiranë duan një person që të jetë përtej partive politike.

Në një intervistë për Euronews Albania, Idrizi tha se do preferonte më mirë një arkitekt ose një urbanist se sa një person që është pjesë e politikës.

“Duhet një profil që të jetë fitues jo vetëm për kundërshtarin, por të jetë fitues  për qytetarët e Tiranës. Unë do të doja që kandidat të ishte një urbanist, një arkitekt. Ne këtë duam kësaj radhe”- u shpreh ai.

Idrizi teksa foli për zgjedhjet lokale të 2023, tha se Partia Demokratike duhet të bashkohen, pasi dy palët  politike më shumë kanë luftuar veten se kundërshtarët.

Më tej, kryetari i PDIU nënvizoi se ditën e djeshme nuk ka zhvilluar takim me kreun e PD-së Sali Berisha.

“PD në radhë të parë, duhet të unifikohet brenda vetes vet. Problemi më i madh që ka pasur politika shqiptare është dialogimi. Nuk është e udhës që PD të jetë në dy pjesë në këto zgjedhje  dhe u takon atyre të gjejnë gjuhën në këtë rast dhe të bashkohen. Ato më shumë kanë luftuar veten e vet se të tjerët. Zgjedhjet lokale janë ndryshe nga ato politike. Ne nuk do të gjejmë më të mirin për PD por do të gjejmë ofertën më të mirë për qytetarët.

Unë nuk jam takuar me Berishën. PDIU është një parti sovrane, i merr vet vendimet, ka 12 vjet që është parti parlamentare dhe sigurisht kemi kohë që punojmë për votën dhe peshën e PDIU.

Vendi ka nevojë për një opozitë, dhe opozita është institucion në demokraci. Është një moment shumë i mirë për opozitën që të bashkohet. PDIU është duke ndjekur çdo zhvillim dhe nëse nuk na duan, ne mund të dalim  dhe të vetme në zgjedhje”-përfundoi ai.

LEXONI GJITHASHTU: 

• Zgjedhjet lokale, Idrizi: Në Tiranë na duhet një kandidat përtej partive politike
• Valteri: Alibeaj nuk ekziston në PD, kryetar është Berisha