Shqipëria më pak fonde se BE për mbrojtjen sociale dhe shëndetësinë

Shqipëria ndan shumë më pak fonde nga buxheti i përgjithshëm për mbrojtjen sociale dhe shëndetësinë në krahasim me mesataren e Bashkimit Europian.

Të dhënat e Eurostat treguan se 27 vendet anëtare te BE dhanë për mbrojtjen sociale 39.2 % të buxhetit të tyre në vitin 2022, ndërsa Shqipëria vetëm 30 %.

Sektori me peshën më të lartë në shpenzimet buxhetore si në BE dhe në Shqipëri është ‘Mbrojtja sociale’.

Ky zë dominohet nga shpenzimet për fondin e pensioneve si edhe programet në mbështetje të familjeve dhe individëve në nevojë  ku përfshihet ndihma ekonomike dhe aftësia e kufizuar.

Por Shqipëria ndan nga buxheti i saj për këtë zë rreth 9.2 % fonde më pak se Bashkimi Europian.

Gjithashtu, qeveria shqiptare ndan shumë më pak fonde për shëndetësinë se BE.

Në vitin 2022 vendet e BE çuan 15.5 % të shpenzimeve buxhetore për shëndetësinë, ndërsa Shqipëria në të njëjtin vit I dha shëndetësisë vetëm 10 % të buxhetit total.

Për sektorin e arsimit si Shqipëria dhe BE çojnë afërsisht të njëjtën përqindje të buxhetit.

Shqipëria ndan më shumë se BE fonde për të përballuar shërbimet e përgjithshme publike dhe çështjet ekonomike që përfaqësojnë investimet.

Mbrojtja e Mjedisit edhe pse është një çështje e nxehtë në të gjithë botën, mori vetëm 1.6% të buxhetit të BE dhe 1% të buxhetit të Shqipërisë me 2022.

LEXONI GJITHASHTU:

• Alarmi nga obeziteti/ OBSH: Në 2035 1 në 2 të rritur do jenë obezë
• Makina përplas të moshuarin me biçikletë në Berat, shoferi e lë në tokë e arratiset