Shqipëria rikthen regjimin e vizave për shtetasit rusë

Shqipëria vendos të anulojë hyrjen pa viza për shtetasit rus gjatë sezonit veror. Në listën e publikuar nga Këshilli i Ministrave është hequr emri i Rusisë për shtetasit e atyre vende që nuk kanë nevojë për vizë për të hyrë në Shqipëri gjatë periudhës 1 maj deri më 30 shtator.

Ky vendim merret pak javë përpara nisjes së sezonit turistik.

Një vit më parë kjo temë shkaktoi debate në politikën shqiptare, pasi kryeministri Edi Rama refuzoi kërkesën e homologut ukrainas, Volodimir Zelenski, për të ndaluar hyrjen e rusëve. Kërkesë e cila u përsërit edhe nga politikanë të opozitës. Megjithatë, Rama deklaroi se vendimi do ishte në të njëjtën linjë me Bashkimin Europian.

Gjithsesi, qeveria shqiptare ka vendosur të ashpërsojë së fundmi qëndrimin, duke ndaluar hyrjen pa vizë të rusëve në Shqipëri. Pritet të shihet impakti që do të ketë vendimi tek turizmi në vend, ndërkohë që vitin e kaluar vendin tonë e vizituan mbi 30 mijë shtetas rusë.

LEXONI GJITHASHTU:

• Rusia bombardon ‘aksidentalisht’ qytetin e vet
• Rusia refuzon lirimin e reporterit të ‘Wall Street Journal’