Shtëpia e Bardhë shemb pjesën e Krahut Lindor për sallën e ballos së Trump

Pjesa e Krahut Lindor të Shtëpisë së Bardhë është shembur, ndërsa fillojnë punimet për sallën e re të ballove të Presidentit të SHBA-së, Donald Trump.

Ekipet e ndërtimit të hënën shembën pjesë të mëdha të një hyrjeje të mbuluar dhe dritareve në Krahun Lindor, për të cilin Trump tha se po “modernizohet plotësisht”.

Më parë presidenti deklaroi se shtimi i sallës së vallëzimit në Shtëpinë e Bardhë prej 250 milionë dollarësh do të ishte “afër” strukturës ekzistuese, por nuk do ta ndryshonte atë.

“Nuk do të ndërhyjë në ndërtesën aktuale. Nuk do të jetë. Do të jetë pranë saj, por pa e prekur dhe i tregon respekt të plotë ndërtesës ekzistuese, për të cilën jam fansi më i madh. Është vendi im i preferuar. Është vendi im i preferuar. E adhuroj”, tha Trump në korrik.

Trump njoftoi ndërtimin në një postim në rrjetet sociale, duke thënë se “janë hedhur themelet për hapësirën shumë të nevojshme të sallës së vallëzimit”.

“Për më shumë se 150 vjet, çdo President ka ëndërruar të ketë një Sallë Vallëzimi në Shtëpinë e Bardhë për të akomoduar njerëz për festa të mëdha, vizita shtetërore”, shkroi ai.

Ai tha se projekti po financohet privatisht nga “shumë persona bujarë”.

Shtëpia e Bardhë ka shërbyer si rezidenca historike e presidentit të SHBA-së për dy shekuj. Krahu Lindor u ndërtua në vitin 1902 dhe u modifikua për herë të fundit në vitin 1942.

Trump shkroi në postimin e tij se Krahu Lindor ishte “plotësisht i ndarë” nga Shtëpia e Bardhë, megjithëse është i bashkangjitur me strukturën kryesore.

Trump ka bërë një sërë ndryshimesh në Shtëpinë e Bardhë këtë vit, duke përfshirë ridekorimin e Zyrës Ovale me një larmi dekorimesh ari dhe shtrimin e barit në Kopshtin e Trëndafilave me beton për të shtuar tavolina dhe karrige.

Projekti i ri i rinovimit të Shtëpisë së Bardhë është kritikuar nga Shoqata e Historianëve të Arkitekturës, një grup ndërkombëtar jofitimprurës që studion ruajtjen e ndërtesave historike në të gjithë botën.

Në një deklaratë javën e kaluar, grupi tha se “shpreh shqetësim të madh në lidhje me shtesat e propozuara në sallën e vallëzimit”, të cilat vëren se “do të jenë ndryshimi i parë i madh në pamjen e saj të jashtme në 83 vitet e fundit.

Instituti Amerikan i Arkitektëve ka shprehur gjithashtu alarm dhe ka bërë thirrje për një shqyrtim transparent të projektit.

LEXONI GJITHASHTU:

• Trump: Nuk mendoj se Ukraina mund të fitojë luftën kundër Rusisë