Shtyhet dueli Osasuna-Barcelona, ndërron jetë mjeku i klubit blaugran

Një ngjarje tragjike është regjistruar në nisje të duelit Osasuna-Barcelona, ku ka humbur jetën mjeku i skuadrës katalanase. Karles Minaro ndërroi jetë në dhomat e zhveshjes si pasojë e atakut kardiak.

Mjeku i Barcelonës, Karles Minaro ka humbur jetën në mënyrë tragjike në krye të detyrës, si pasojë e një ataku kardiak. Ngjarja është regjistruar pak minuta para nisjes së duelit me Osasunën, duke tronditur jo vetëm blaugranët, por gjithë kampionatin, ndërsa u vendos që dueli mes dy skuadrave të mos luhej.

“Barcelona është thellësisht e pikëlluar që njofton vdekjen në mbrëmje të mjekut të ekipit të parë, Carles Miñarro Garcia. Për këtë arsye, ndeshja mes Barcelonës dhe Osasunës është shtyrë për një datë të pacaktuar”, njoftoi vetë klubi.

Karles Minarro ishte 40 vjec, ndërsa iu bashkua ekipit të parë të Barcelonës këtë sezon, teksa që prej 2017ës ka qenë pjesë e akademive të gjigantëve spanjollë. Sa i përket ngjarjes tragjike, ishte vetë kreu i blaugranëve Joan Laporta ai i cili lajmëroi stafin e më pas përfaqësues të ligës spanjolle, duke vendosur në bashkëpunim me Osasunën për shtyrjen e duelit. Osasuna-Barcelona ishte e vlefshme për javën e 27-të La Ligas, ndërsa ende nuk ka një datë se kur do të zhvillohet.

Do të jetë La Liga ajo e cila do të vendosë datën e re për luajtjen e kësaj përballje.

LEXONI GJITHASHTU:

• Barcelona perfekte në La Liga, blaugranët me 6 fitore radhazi
• Champions League/ Dramë në limite, Barcelona përmbys 4-5 Benficën! Zhgënjen Juventus