Shuhet Paolo Rossi, ish-futbollisti i Italisë ndahet nga jeta në moshën 64-vjeçare

“Heroi” i botërorit të vitit 1982, Paolo Rossi, i cili i dhuroi titullin kampion Italisë, është ndarë nga jeta në moshën 64 vjeçare.

Ish-sulmuesi i njohur i kombëtares së kaltër vuante nga një sëmundje e pashërueshme.

Rossi ishte lojtari më i mirë për Italinë në botërorin e 82-shit. Në atë kampionat ai arriti që të fitonte “Këpucën e Artë”, si shënuesi më i mirë dhe çmimin e “Lojtari më i mirë i turneut”.

Për sa i takon karrierës së klubeve ai është aktivizuar me skuadrën e Juventusit ku ka fituar dy herë titullin kampion në Serie-A, një kupë Evrope dhe një kupë Italie.

Ky vit nuk ishte aspak i mbarë për botën e futbollit pasi edhe Diego Armando Maradona, u nda nga jeta disa ditë më parë.