“Si diplomat u zbut më shumë se ç’duhet”, Rama komenton dorëheqjen e Ermal Dredhës

Kryeministri Edi Rama komentoi dorëheqjen e kryebashkiakut të Vlorës Ermal Dredha, duke e cilësuar atë vendimin e një njeriu të përgjegjshëm që e do qytetin e vet.

Teksa iu referua problematikave të vëna në dukje prej tij gjatë takimeve me drejtorë në këtë bashki, Rama tha se Dredha ishte më i miri në gjithë atë situatë, ndërsa shtoi se fakti që ka jetuar për shumë kohë jashtë vendit e kishte zbutur më shumë se ç’duhet.

“Nga gjithë sa pashë, dëgjova dhe kuptova dhe vajtova mbi situatën e qytetit dhe shërbimin e drejtorive qendrore në atë territor. Vetëkënaqësi labe e mbingarkuar me re në pantallonat e pushtetit, dembelizëm dhe karshillëk ndaj popullit të Vlorës nga njerëz pa fe, atdhe, pa din e iman me mandatin e drejtorit. Të tërë hipur mbi shpatullat e qeverisë, në kuptimin që qeveria investo për Vlorën, këta shkel me këmbë hipur si pasagjerët e kuçit. Dua të bëj të qartë që kjo situatë do ishte gabim i madh sikur të lidhej me kryetarin e bashkisë, i cili në të gjithë atë situatë është më i miri. Se nëse lidhet me kryetarin e bashkisë bëhet gabimi tjetër që ia lëmë vetëm Vlorës. Nuk është vetëm Vlora dhe dorëheqja e Ermalit, është treguesi i asaj që thashë i një njeriu që e ndjen, e do Vlorën dhe që i vetmi problem që ka është se duke ndenjur për një kohë të gjatë larg Vlorës e Shqipërisë, u zbut më shumë se çfarë duhet për të përballuar aradhenë. “Të përfaqësosh Vlorën në radhët e deputetëve të PS është një nder shumë i veçantë që për ta merituar duhet të jesh i denjë.  Nuk është vetëm Vlora, por Vlora ka zakonin që bie në sy”, tha Rama.

LEXONI GJITHASHTU:

• Rama propozon 11 komisione parlamentare, si ndahen mes mazhorancës dhe opozitës
• Reforma Zgjedhore/ Rama: Koha për depolitizimin e administratës zgjedhore