“Mendoj se kosovarët janë adhurues të mëdhenj të festave të Shqipërisë, sepse para luftës kanë qenë festat e vetme që kemi festuar,” – shprehet një qytetare.
Durrësi edhe për këto Festa Nëntori do të jetë pika ku do të takohen qytetarët e trojeve shqiptare.
Ndonëse na ndajnë gati 2 javë nga ato, operatori turistik, Blerim Norja thotë se që tani hotelet janë 80% të rezervuara.
“Durrësi ka një minisezon gjatë kësaj periudhe. Që tani kemi diku tek deri 80% dhoma të rezervuara me grupe të organizuara, kurse individët rezervojnë më vonë,” – tregoi operatori turistik.
Arsyet se përse vijnë i tregojnë më mirë vetë ata.
“Padyshim që jemi të lidhur me historinë tonë kombëtare. Ne nuk kemi dallime sa i përket festave, jo vetëm në Kosovë, por në të gjitha trojet shqiptare,” – tha një burrë.
“Këtu ka organizime më të mira sesa te ne, prandaj një pjesë e madhe vijnë këtu. Unë vetë po, se kam arsye, se kam ditëlindjen,” – u shpreh një grua.
Prandaj, tur-operatorët kanë përgatitur paketa ekskluzivisht për ta vetëm për Festat e Nëntorit.
“Duke qenë se i bie një fundjavë e gjatë, sepse Festat e Nëntorit bien gjatë javës, kemi bërë një ofertë shumë të mirë, një ofertë tre-ditore me një çmim prej 35-eurosh për person. Dihet që do të ketë një dekor të veçantë me tiparet e Festës së Flamurit. Do ketë edhe muzikë tradicionale shqiptare e patriotike,” – tha Norja.
LEXONI GJITHASHTU:
- 14-nëntori, Dita Botërore e Diabetit
- Panairi i 26-të i librit hap dyert nga data 15 deri në 19 nëntor
