Si tentoi Bayern Munich të “rrëmbejë” Lamine Yamal nga Barcelona

Lamine Yamal, një nga talentet më premtuese të futbollit evropian dhe ylli i Barcelonës, thuhet se ka qenë shumë pranë një transferimi të bujshëm te Bayern Munich kur ishte vetëm 14 vjeç.

Sipas raportimeve, agjenti i njohur Jorge Mendes ndërhyri dhe e bllokoi marrëveshjen, duke mbajtur adoleshentin te klubi katalanas.

Pavarësisht se mbushi vetëm 18 vjeç këtë verë, Yamal ka bërë më shumë se 100 paraqitje me ekipin e parë të Barcelonës, duke shënuar 27 gola.

Ai ka fituar dy tituj të La Ligës me gjigantët katalanas dhe ka qenë një pjesë kyçe e përfaqësueses spanjolle që fitoi Kampionatin Evropian në vitin 2024.

Çmimet individuale të Yamalit përfshijnë “Golden Boy” dhe “Trofeun Kopa”, të dyja nderime prestigjioze që vlerësojnë talentet më të mirë të rinj në botën e futbollit.

Megjithatë, sipas gazetës gjermane Bild, Barcelona ishte pranë humbjes së tij kur ai ishte vetëm 14 vjeç.

Bayern Munich kishte bërë një përpjekje serioze për të nënshkruar me të, pasi departamenti i tyre i vëzhgimit kishte prezantuar pamje të aftësive të tij drejtorëve të klubit.

Drejtori sportiv i atëhershëm i Bayern, Hasan Salihamidžić, dhe drejtori teknik Marco Neppe thuhet se shprehën interes për lojtarin përmes agjentit të tij të asaj kohe, Iván de la Peña. Interesi u shfaq fillimisht gjatë një takimi për një transferim të mundshëm të Gavit, një tjetër talent i madh i Barcelonës.

De la Peña thuhet se i informoi drejtuesit e Bayernit se do ta njoftonte familjen e Yamalit për ofertën dhe do të organizonte një takim për të diskutuar transferimin, i cili ligjërisht mund të realizohej vetëm kur Yamal të mbushte 16 vjeç (në korrik 2023).

Megjithatë, kjo marrëveshje e mundshme dështoi pasi Yamal ndryshoi përfaqësim dhe u bë klient i Jorge Mendesit, agjentit të njohur që përfaqëson edhe Cristiano Ronaldon.

Kur përfaqësuesit e Bayernit kontaktuan Mendesin, ai thuhet se sugjeroi se një tarifë prej rreth 5 milionë eurosh mund të mjaftonte për ta bindur familjen e Yamalit për të kaluar në Bavari. Sidoqoftë, drejtuesit e Bayernit hezituan për të bërë një investim kaq të madh për një 14-vjeçar, duke e shtyrë vendimin.

Në fund, Yamal debutoi me ekipin e parë të Barcelonës në prill 2023, në moshën 15 vjeç, 9 muaj e 16 ditë, duke zëvendësuar pikërisht Gavi – objektivin fillestar të Bayernit – në një ndeshje të La Ligës. Më vonë atë vit, klubi i rinovoi kontratën deri në vitin 2026, që ishte maksimumi i lejuar për lojtarët nën 18 vjeç (3 vite).