Skandal me Mirild Dakun, tifozët e Zenitit fyejnë lojtarin e Kombëtares! Nis hetimi

Sulmuesi i Kombëtares shqiptare dhe i Rubin Kazanit, Mirlind Daku, është bërë objekt i thirrjeve fyese nga tifozët e Zenitit të Shën Petersburgut gjatë ndeshjes së zhvilluar më 12 gusht, në kuadër të raundit të dytë të fazës së grupeve të Kupës së Rusisë.

Takimi, që përfundoi me fitoren 3-0 të Zenitit, u shoqërua me tensione në tribuna, ku një pjesë e tifozëve vendas ofenduan 27-vjeçarin shqiptar.

Ngjarja është konfirmuar edhe nga Komiteti i Kontrollit dhe Disiplinës i Federatës Ruse të Futbollit (RFU), i cili ka njoftuar se do të shqyrtojë incidentin. Kreu i këtij komiteti, Artur Grigoryants, deklaroi për agjencinë ruse RIA Novosti se mbledhja disiplinore do të mbahet më 20 gusht.

Në ndeshje, Daku arriti të shënojë një gol, por ai u anulua pas rishikimit me VAR. Ironikisht, gjatë merkatos së verës sulmuesi ishte shumë pranë transferimit te Zeniti, por në fund zgjodhi të qëndrojë te Rubin Kazani, që i rinovoi kontratën.

Rasti ka tërhequr vëmendjen e mediave ruse dhe ka rikthyer në fokus marrëdhënien mes klubit të Zenitit dhe sulmuesit shqiptar. Federata ruse pritet të vendosë nëse Zeniti do të ndëshkohet për sjelljen e tifozëve të tij.