Skandali me mbetjet e rrezikshme, Krimi Ekonomik “zbarkon” te Kurum

Ditën e sotme një grup ekipesh të Krimit Ekonomik të Durrësit kanë mbërritur pranë kompanisë turke Kurum në Elbasan për të hetuar mbi skandalin e eksporteve të mbetjeve te rrezikshme.

Pritet që në Kurum të mbërrijnë edhe prokurorët e Durrësit të cilët po ndjekin këtë çështje. Ata do të njihen me dokumentacionin dhe arkivat e kompanisë e cila operon në Elbasan që prej vitit 1998. Ndërkohë, Inspektorati Shtetëror i Punës dhe Shërbimeve Shoqërore po monitorojnë zhvillimet në Kompaninë turke “Kurum International” e cila jo zyrtarisht deklaroi para pak ditësh se puna në Uzinën e Çelikut është ndërprerë prej më shumë se 1 jave.

Shkak i ndërprerjes sipas kompanisë është bërë rritja e kostos së prodhimit të çelikut, duke bërë që kjo kompani të mos jetë konkurruese me tregun e Kinës dhe Turqisë. Kompania turke pretendon se janë lajmëruar punonjësit dhe se është bërë marrëveshja e sindikatën e punonjësve për ndërprerjen e punës.

Me mbylljen e aktivitetit rezulton se të paktën 500 punonjës mbeten pa punë. Prokuroria e Durrësit ka nisur hetimet, dhe i gjithë aparati shtetëror po hetojnë çështjen pasi kompania bëri lëvizjen e papritur duke mbyllur dyert për 500 punëtorë dhe duke pezulluar aktivitetin prodhues.

Aktualisht në këtë kompani vijon punën vetëm sektori i shitjes. Të mbyllura janë Uzina e Çelikut dhe Petëzimit. Punëtorëve ju është premtuar vijimi i pagesës deri në Tetor 2024.

LEXONI GJITHASHTU:

• Skandali i mbetjeve, ambientalisti: Janë fshehur mbetjet e rrezikshme
• Reagon Dogana e Prishtinës: Nuk nisëm mbetje të rrezikshme në Kinë