Skenografia e Festivalit Folklorik, Esnal: U bazova tek motivet tradicionale

Skenografia e Festivalit Folklorik të Gjirokastrës po cilësohet si një prej pikave më të forta të edicionit të 11-të të organizimit të tij.

Skena ka ruajtur pjesën bazë të elementëve të dikurshëm të realizuar nga skenografi Ilia Xhokaxhi, ndërkohë që në këtë festival artistja spanjolle Ines Esnal sjell një skenografi bashkëkohore dhe impresionuese.

Skenografia e re është bazuar simbolikisht në fijet dhe endjen tradicionale të pëlhurës në tezgjah duke e gërshetuar me motive të traditës. Në këtë mënyrë duke i bashkëngjitur edhe elementët e vetë kalasë, skena e bën të këndshme ndjekjen e festivalit nga spektatorët.  

 “Kjo është hera e parë që unë punoj në Shqipëri, ishte një eksperiencë shumë e mirë. Unë isha tepër e ngazëllyer kur studioja përkatëse dhe Ministria e Kulturës më kontaktuan për projektin. Një projekt i shpejtë por tepër emocionues kështu që nuk mund të thoja “Jo !”,veçanërisht kur pashë këtë mjedis”,- Ines Esnal, skenografe.

Skenografja spanjolle tregoi edhe idenë që zbatoi në terren për ndërtimin e kësaj skene.

 “Puna ime ka të bëjë shumë me fijet dhe gjithçka shkoi mjaft mirë me konceptet e përpunimit të pëlhurës dhe traditës së përpunimit të gurit. Ideja ishte të kishim të gjitha ngjyrave që kanë të bëjnë kryesisht me gurin, po ashtu përdorimi i ngjyrës së kuqe ishte një sfidë me vete në një ambient të jashtëm. Ne i përdorëm këto ngjyra për të prodhuar sa më shumë kontrast”,- Ines Esnal, skenografe.

Festivali Folklorik i Gjirokastrës po zhvillohet prej datës 24 qershor në kalanë e Argjiros me pjesëmarrjen e ansambleve dhe grupeve folklorike nga hapësira mbarëshqiptare. Ky festival ka ndikuar edhe në zhvillimin e turizmit të qytetit, pasi në Gjirokastër këto ditë po qëndrojnë turistë nga e gjithë bota.

LEXONI GJITHASHTU:

• Nën ujërat e zeza, zbulohet në Durrës mozaiku i rrallë 1900-vjeçar
• “Këto janë sekrete!”, Trump pranon konfidencialitetin e dokumenteve