Sllovakia dhe Hungaria nuk do të vendosin sanksione ndaj energjisë ruse

Sllovakia dhe Hungaria nuk do të mbështesin propozimin e Bashkimit Europian, për vendosjen e sanksioneve ndaj energjisë ruse.

Të dyja vendet shumë të varura nga furnizimet e Rusisë dhe nuk ka alternativa të menjëhershme për t’i zëvendësuar, shkruan US News.

Ministri sllovak i Ekonomisë, Richard Sulik tha se do të duheshin vite që rafineria e vetme në vend, Slovnaft, të kalonte nga nafta bruto ruse në një lloj tjetër nafte.

Ndërsa, ministri i Jashtëm hungarez, Peter Szijjarto u shpreh se vendi i tij nuk do të votojë për sanksione që “do ta bënin të pamundur transportin e gazit natyror ose të naftës nga Rusia në Hungari”.

“Çështja është e thjeshtë: furnizimi me energji i Hungarisë nuk mund të rrezikohet, sepse askush nuk mund të presë që çmimi i luftës të paguhet nga hungarezët”, tha Szijjarto gjatë një vizite në Kazakistan.

Komisioni Evropian, ka hartuar propozime të reja për sanksione, të cilat mund të përfshijnë një embargo me faza ndaj naftës ruse.

27 vendet anëtare pritet të diskutojnë të mërkurën, por mund të duhen ditë që masat të miratohen dhe të hyjnë në fuqi.

LEXONI GJITHASHTU

• Gjermania mund ta përballojë embargon e naftës ruse, thotë Ministri i Ekonomisë
• Hungaria kundër BE-së për embargon ndaj naftës dhe gazit rus