Sot seanca, “blindohet” Parlamenti. Bardhi: Akt turpërues, s’është qeli burgu

Këtë të enjte pritet të mbahet seanca parlamentare e cila u shty një javë më parë. E ndërsa në seancën e fundit të zhvilluar mbizotëruan kaosi dhe rrëmuja, ku deputetët e opozitës dogjën karriget dhe nuk lejuan zhvillimin e seancës, këtë të enjtë garda duket se ka marrë masa shtesë.

Gardh metalik te hyrja kryesore e Parlamentit nga forcat gardiste dhe efektivë në numër të shtuar janë vendosur për të parandaluar çdo incident të mundshëm që vjen nga deputetët opozitarë, por edhe jashtë perimetrit të institucionit.

Lidhur me këtë ka reaguar me anë të një statusi në Facebook, kreu i grupit parlamentar të Partisë Demokratike. Ai është shprehur se Kuvendi nuk është burg dhe se shënderrimi i tij në një “qeli të rrethuar me hekura” është një akt që turpëron Shqipërinë dhe çdo shqiptar.

“Ky është Kuvendi i Shqipërisë sot në mëngjes! Dera kryesore e tij e rrethuar me hekura dhe me më shumë forca sigurie sesa deputetë.

Shqipëria bëhet kështu vendi i vetëm, që nga njëra anë është vend anëtar i NATO-s dhe vend kandidat për në Bashkimin Europian, dhe nga ana tjetër rrethon hyrjen kryesore të Kuvendit për ta mbrojtur nga deputetët “armiq”!

Kuvendi nuk është burg dhe as qeli burgu, edhe pse shumica e përfaqësuesve të mazhorancës qeverisëse duhet të ishte në burg dhe jo në atë sallë. Shndërrimi i Kuvendit në “qelinë e rrethuar me hekura” të Pëllumb Gjokës e të ngjashmëve të tij është një akt që turpëron Shqipërinë dhe çdo shqiptar!”-shkruan Gazment Bardhi.

LEXONI GJITHASHTU:

• “Po fryn një erë e re”, Lami komenton rritjen e pëlqyeshmërisë për liderët e rinj
• Çfarë mendojnë shqiptarët për liderët e rinj