Spiropali përplaset me Berishën: Je pensionisti më i shtrenjtë në Shqipëri

Seanca e sotme parlamentare është shoqëruar me debate mes kryedemokratit Sali Berisha dhe ministres Elisa Spiropali.

Kjo e fundit i është përgjigjur Berishës pasi tha se Shqipëria është në krizë të thellë dhe se qytetarët e vendit tonë janë më të vjedhurit në Europë.

Ministrja me tone të ashpra e ka quajtur Berishën “pensionistin më të shtrenjtë në Shqipëri”, teksa ndërsa listoi ndihmat e qeverisë për qytetarët.

“Po shoh që ke bërë gati laptopin, po nuk e kuptoj ku të çon ajo mushkë. Ne kemi punët tona. Po merremi me pensionistët, do indeksojmë pensionistët. Ata presin nga ne, ju prisni nga këta doktor se as këta nuk i ke se kur u mblodh grupi parlamentar nuk e zgjodhe dot kryetarin. Je pensionisti më i shtrenjtë i Shqipërisë, por do të durojmë”, tha Spiropali.

Sakaq Berisha, ka lëshuar akuza të rënda ndaj ministres teksa ka denoncuar një rast privatizimi në fshatin Frakull e Madhe të Fierit. Ai tha se dhoma e zhveshjes për fëmijët që luanin futboll, ishte privatizuar dhe i ishte dhënë vjehrrit të Elisa Spiropalit me ndërhyrjen e kësaj të fundit.

“Nëse do të njohësh inteligjencën e sundimtarit, shih ata që ka përreth. Por kam një problem të dytë. Meqë zonja u gozhdua te pensionistët, nuk mund të mohohet se ajo ka një dhembshuri patologjike për një pensionist të vetëm.

Kjo dhembshuria jote për pensionistët konkretizohet në mënyrë të mrekullueshme. I lë fëmijët të zhvishen në të ftohtë, ndërsa ndërtesa është dhënë me ndërhyrjen e zonjës Spiropali”, tha Berisha, teksa lexoi mesazhin e një qytetari.

LEXONI GJITHASHTU: 

• Salianji: Njeriu i afërt i Ramës ndërtoi 4 kate pa leje në mes të Tiranës