Stoltenberg zbulon si mund të detyrohet Rusia që të negociojë për luftën në Ukrainë

Sekretari i Përgjithshëm i NATO-s, Jens Stoltenberg deklaroi se vendet perëndimore duhet të jenë të gatshme për të ofruar mbështetje afatgjatë për Ukrainën, sepse Rusia nuk po tregon shenja të heqjes dorë nga lufta.

Ai shtoi se mbështetja ushtarake do të sigurojë mbijetesën e Ukrainës si një vend sovran dhe do ta detyrojë Rusinë të ulet dhe të negociojë për t’i dhënë fund luftës, shkruan BBC.

“Forcat ukrainase kanë pasur iniciativën prej disa muajsh, por ne gjithashtu e dimë se Rusia ka mobilizuar shumë më tepër forca që aktualisht janë duke u trajnuar. E gjithë kjo tregon se ata janë të gatshëm të vazhdojnë luftën dhe të përpiqen të fillojnë një ofensivë të re,” theksoi Stoltenberg.

Më herët, presidenti rus Vladimir Putin mbajti një fjalim për Vitin e Ri, në të cilin u përpoq të mblidhte njerëzit pas trupave të tij që luftonin në Ukrainë, duke thënë se e ardhmja e vendit ishte në rrezik.

Homologu i tij ukrainas, Volodymyr Zelensky akuzoi Putinin se fshihej pas trupave të tij në vend që t’i drejtonte ato.

LEXONI GJITHASHTU

• Sulmet me raketa për Vitin e Ri, Zonja e Parë e Ukrainës ‘shpërthen’ ndaj Rusisë
• Fjalimi i Putinit drejtuar kombit: Mbrojtja e atdheut, detyrë e shenjtë e rusëve
• ‘Bisedimet me Ukrainën s’do jenë të qeta’, Xi-Putinit: Do mbajmë qëndrim objektiv