Studentët të marrin sqarim shkencor për vaksinën anti-COVID, thotë ish-ministri i Shëndetësisë

Ish-ministri i Shëndetësisë Gjergji Koja tha në studion e “Now” se studentët duhet të marrin edukim shkencor mbi vaksinën anti-COVID, në mënyrë që të luftojnë skepticizmin.

Kjo vjen si arsye se një pjesë e mirë e studentëve në vend hezitojnë të bëjnë vaksinën, edhe pse ky qëndrim i privon nga marrja pjesë në auditor për mësimet.

“Me studentët duhet durim dhe sqarim shkencor”, tha z. Koja.

Gjergji Koja tha se vaksina ka kapacitetin për të shpëtuar jetë, pasi shumica e të shtruarve në spital për COVID janë të pavaksinuar.

“Mbi 95% e të shtruarve në spital, janë të pa vaksinuar. Rrezikojnë të sëmuren, të hospitalizohen dhe të humbin jetën nëse nuk bëjnë vaksinën. Vaksina nuk të garanton 100% mbrojtje, por fakti që shumica e të shtruarve janë të pa vaksinuar, provon që është e efektshme”, u shpreh Gjergji Koja.

Në vend është vaksinuar rreth 46% e popullsisë, bëri me dije ish-ministri, i cili shtoi se Shqipëria e ka kapacitetin e përdorimit të vaksinave mbi 80%, me mbi 532 pika vaksinimi në të gjithë vendin.

LEXONI GJITHASHTU:

• Ulqinaku konfirmon: Vaksina nuk ka lidhje me sterilitetin, bota është vaksinuar, lindjet vazhduan