Studiuesi nga Kosova: Shqipëria ofron larmishmëri çmimesh, por turisti ndeshet me probleme

Studiuesi nga Kosova, Agron Demi, i cili vepron pranë institutit “GEP” thotë se turizmi i shqiptarëve të Kosovës bazohet kryesisht tek Diaspora.

Sipas tij, shqiptarët që jetojnë jashtë ose vijnë vetë ose u dërgojnë para familjarëve të tyre dhe kjo bën që turistët përtej kufirit të zgjedhin bregdetin shqiptar për të kaluar pushimet verore.

Ai thotë se edhe nëse rriten çmimet në Shqipëri, shqiptarët e Kosovës sërish do të zgjedhin bregdetin tonë.

“Ajo që e financon turizmin në Kosovë është Diaspora. Ka hapësirë edhe nëse rriten çmimet në Shqipëri, kosovarët mund të vijnë. Shqipëria ofron larmishmëri çmimesh, prej çmimeve më të ulëta në Shëngjin, Velipojë, e deri tek çmimet më të larta në Sarandë apo Ksamil”, tha ai në emisionin “Barometri”.

Por pavarësisht dëshirës për të zgjedhur Shqipërinë, ai thotë se turistët hasin në probleme, kryesisht në pjesën e rezervimeve online në hotele.

“Për shumë turistë, mungon infrastruktura e pagesave bankare. Një turist nga Kosova i duhet të marrë tërë paratë CASH me vete pasi mundësia për pagesë është shumë e vogël dhe problemi tjetër është se e vërejnë se rezervimi online është shumë i vështirë dhe kjo e pengon rezervimin, kryesisht në jug të Shqipërisë”, shtoi ai.