Sulm në Krimenë e aneksuar, Ukraina godet teksa Rusia kryen stërvitje bërthamore

Ukraina goditi dy objektiva në gadishullin e Krimesë natën mes së enjtes dhe së premtes, bëri të ditur drejtuesi rus i gadishullit të aneksuar.

Sipas tij, dy persona mbetën të vrarë si pasojë e sulmit të parë me raketë në lokalitetin Simferopol, që është qendra kryesore administrative e Krimesë.

Më pas, trupat ukrainase goditën një ndërtesë në Alushta, në atë pjesë të gadishullit që shtrihet në Detin e Zi.

Moska deklaroi se godina në momentin e sulmit ishte e boshatisur, ndërsa grupi ukrainas i rezistencës raportoi për disa viktima.

Sulmet erdhën në një kohë kur Rusia po kryen stërvitje në distriktin ushtarak jugor të saj, që përfshin edhe gadishullin e pushtuar të Krimesë.

Stërvitjet përfshijnë armë bërthamore taktike si bombat e ajrit, koka për raketa me rreze të shkurtër veprimi dhe municione artilerish.

Armët bërthamore taktike janë më pak të fuqishme se armët tradicionale bërthamore, por mund të përdoren në fushën e betejës.

Rusia mban rregullisht stërvitje që përfshijnë armë nukleare taktike, por kjo është hera e parë që Kremlini i ka njoftuar ato.

LEXONI GJITHASHTU:

• Sulmi në Krime, Zakharova paralajmëron Perëndimin të mos “luajë me zjarrin” 
• Rusia: Kemi zmbrapsur një sulm masiv të Ukrainës mbi Krime