Dy sulme me dronë janë kryer në territorin rus duke shërbyer si provë për vazhdimin e mëtejshëm të luftës së Moskës në Ukrainë.
Gjithashtu, një zjarr i rënë në një aeroport në rajonin e Kurskut po konsiderohet nga autoritetet si “sulm terrorist”. Ai vjen një ditë pas disa sulmeve të ngjashme ndaj dy bazave ajrore ruse, për të cilat Kremlini fajësoi Kievin.
“Pas episodeve të dhunës vendosëm të rrisim nivelin e alarmit terrorist dhe ta zgjasnim atë për 15 ditë. Pas zjarrit në pistën ajrore të Kurskut u vendos anulimi i mësimit në dy shkolla të afërta,” – deklaroi Roman Starovoit, guvernator i rajonit të Kurskut, Rusi.
Sulmet me dronë ndodhën teksa presidenti Volodymyr Zelensky zhvilloi një vizitë surprizë në Donjeck, ku nderoi trupat ukrainase të përfshira në luftimet intensive.
“Sot jemi në Donbas. Lufta këtu është bërë më agresive, beteja më e vështirë dhe çmimi që po paguajmë më i lartë. Por ka diçka që mbetet e pandryshuar, e ngurtë si hekuri; është kuraja, rezistenca, vullneti juaj dhe rrjedhimisht liria jonë,” – u shpreh presidenti ukrainas, Zelensky.
Vizita e Zelenskyt mund të rrisë moralin, por beteja që po zhvillohet në Bakhmut, epiqendër e luftimeve në Donjeck, po u merr jetën shumë ushtarëve.
LEXONI GJITHASHTU: