‘Kryehakeruesi është Rama’, Meta: Prokuroria hetim të thelluar për sulmet

Kryetari i Partisë së Lirisë deklaroi në një konferencë për media se Edi Rama është kryehakeruesi i këtij sistemi.

“Kjo u provua botërisht nga dalja e të dhënave personale të gati 1 milion qytetarëve para zgjedhjeve dhe përdorimi i tyre nga patronazhistët vetëm për qëllime të shantazhit elektoral,” – u shpreh Meta.

Sipas tij ishte kryeministri ai që mbështeti këtë proces. Meta kujtoi hakerimin ku u ekspozuan fillimisht rrogat, numrat e telefonit të shqiptarëve e më pas targat. Historia, siç tregoi dhe Meta vijoi me hakerimin e e-Albania, ku të dhënat u nxorrën dhe në shitje.

“U godit sistemi TIMS që është një çudi e jashtëzakonshme, një sistem perfekt dhe i mbrojtur prej kohësh, sistemi që bëri të mundur dhe liberalizimin e vizave për qytetarët shqiptar. U godit edhe Aleati, një tjetër çudi,” – deklaroi kreu i PL-së, ndërsa e përfundoi me hakerimin ndaj Policisë së Shtetit dhe kufizimit për të folur rreth e-mail-eve.

Sipas Metës, më 6 maj 2022 kërkoi t’u impononte bankave kryerjen e shërbimeve nëpërmjet e-Albania, ndërkohë që ishte në dijeni për sistemin.

“Kjo kërkesë e çuditshme e Edi Ramës vinte pas goditjeve të njëpasnjëshme dhe hakerimeve masive që kishin ndodhur më parë në të gjithë sistemi,” – kujtoi Meta.

Ai citon ekspertët e kompanisë Microsoft kur thotë se hakerët kanë ndërhyrë në databazën shqiptare që në maj të vitit 2021, ndërsa aksesi i tyre është përforcuar në korrik 2021 dhe janar 2022.

“Kërkojmë të bëhet transparencë e plotë se çfarë ka ndodhur zyrtarisht. Të bëhet transparencë lidhur me masat dhe planin e rivendosjes në punë dhe garantimin e sigurisë së sistemeve, një vlerësim i situatës së sigurisë kombëtare. Prokuroria duhet urgjent të bëjë një hetim të thelluar dhe serioz për hetimin e qeverisë dhe gjithë institucioneve të tjera,” – bëri thirrje Meta.

LEXONI GJITHASHTU:

• Afera e lobimit mbajti peng Bashën, thotë Meta