Sulmet kibernetike që “paralizuan” aeroportet ndërkombëtare, arrestohet një person

Një person është arrestuar në Mbretërinë e Bashkuar lidhur me sulmin kibernetik që shkaktoi ndërprerje në fluturimet në aeroportin Heathrow të Londrës dhe disa aeroporte të tjera evropiane gjatë fundjavës së kaluar.

Agjencia Kombëtare e Krimit (NCA) njoftoi se ka arrestuar një burrë në të 40-at në West Sussex, si pjesë e hetimeve për incidentin që preku Collins Aerospace, kompania që ofron teknologjinë për pikat e check-in-it të linjave ajrore.

NCA-ja dhe policia e njësisë së krimit të organizuar arrestuan burrin të martën në mbrëmje, nën dyshimin për shkelje të Ligjit për Keqpërdorimin e Kompjuterëve. Ai është liruar me kusht.

Incidenti kibernetik, i raportuar të premten e kaluar, shkaktoi vonesa dhe anulime të shumta në disa aeroporte, me Brukselin si më të prekurin.

Linjet ajrore që përdorin sistemin e Collins-it detyruan të bëjnë check-in manual të pasagjerëve. Edhe pse vetëm disa operacione në Heathrow u prekën drejtpërdrejt, rreth 20 fluturime u anuluan gjatë fundjavës dhe shumica e fluturimeve pësojnë vonesa.

Aeroportet e Berlinit dhe Dublin-it raportuan gjithashtu vonesa për shkak të incidentit.

Paul Foster, zv/drejtori i NCA-së dhe kreu i njësisë kombëtare për krimet kibernetike, tha: “Megjithëse ky arrest është një hap pozitiv, hetimi për këtë incident është ende në fazat e hershme dhe vijon.”

“Krimi kibernetik është një kërcënim global i vazhdueshëm që vazhdon të shkaktojë ndërprerje të konsiderueshme në Mbretërinë e Bashkuar. Së bashku me partnerët tanë këtu dhe jashtë vendit, NCA-ja është e përkushtuar të zvogëlojë këtë kërcënim për të mbrojtur publikun britanik.”

Ky incident është më i fundit në një seri shkeljesh kibernetike që kanë prekur kompani të mëdha në Mbretërinë e Bashkuar gjatë këtij viti. Prodhuesi më i madh automobilistik në Britani, Jaguar Land Rover, i zotëruar nga Tata, është detyruar të ndalojë prodhimin për javë të tëra pas një sulmi. Gjithashtu, dyqanet Marks & Spencer dhe Co-op kanë pësuar sulme kibernetike me kosto të lartë.

Collins Aerospace është në pronësi të RTX, një nga grupet më të mëdha në botë të industrisë ajrore dhe të armëve, e regjistruar në Nju Jork.

LEXONI GJITHASHTU:

• Sulmi kibernetik paralizon disa aeroporte evropiane, përfshirë Heathrow-n
• Sulmet kibernetike në linjat ajrore shkaktojnë vonesa në aeroportet evropiane