Sulmet terroriste në veri, Sveçla: 8 të arrestuar dhe arsenal armatimi i konfiskuar

Ministri i Punëve të Brendshme të Kosovës, Xhelal Sveçla doli në një konferencë të jashtëzakonshme ku tha se pas aktit terrorist të së premtes, ku u dëmtua me eksploziv kanali i Ibër–Lepencit, policia ka arrestuar tetë persona të dyshuar në veri të vendit dhe ka konfiskuar arsenal të armatimit.

Ai thotë se sulmi i fundit ndaj infrastrukturës jetike është më i rëndi në Kosovë që nga paslufta. Sveçla thotë se institucionet tashmë kanë bashkërenduar aktivitetet për të zbardhur ngjarjen.

“Pas hetimeve intensive sot në orët e mëngjesit janë organizuar kontrolle dhe janë arrestuar 8 persona të dyshuar për përfshirje në këto raste. Në këto aksione janë konfiskuar armë, eksplozivë, uniforma e gjëra tjera që do t’i shërbejnë hetimit”, tha Sveçla.

Në mbrëmjen e 29 nëntorit, në fshatin Varragë të komunës së Zubin Potokut, në veri të vendit, ka ndodhur një shpërthim që ka dëmtuar kanalin e ujit të Ibër-Lepencit.

Ky kanal furnizon me ujë nga Liqeni i Ujmanit disa qytete të vendit, si dhe Korporatën Energjetike të Kosovës për ftohjen e termoelektranave të saj.

LEXONI GJITHASHTU:

• Ministri i jashtëm serb mohon akuzat, dënon sulmin në Ibër Lepenc
• Bislimi: Krahu i djathtë i Radoiçiç, i dyshuar për shpërthimin në Zubin-Potok!