Sulmi i paralajmëruar i Izraelit kundër Iranit, si arritëm deri këtu

Izraeli ka nisur sulme të paprecedentë ndaj Iranit, duke synuar programin e tij bërthamor dhe udhëheqësit ushtarakë në një sulm që kryeministri Benjamin Netanyahu tha se do të zgjasë shumë ditë. Ushtria izraelite thotë se përdori 200 avionë luftarakë .

Ushtria Izraelite më vonë njoftoi se në shenjë hakmarrjeje, Irani lëshoi ​​mbi 100 dronë drejt territorit izraelit. Të gjithë dronët sipas IDF u neutralizuan.

Një sulm i tillë nuk ishte i papritur, pasi tensionet ishin rritur ndjeshëm në javët e fundit.

Në maj, SHBA-të morën informacione të reja që sugjeronin se Izraeli po përgatitej të godiste objektet bërthamore iraniane, edhe pse administrata e Presidentit Donald Trump ndiqte një marrëveshje diplomatike me Teheranin, sipas shumë zyrtarëve amerikanë të njohur me informacionet e fundit.

Të mërkurën, SHBA-të tërhoqën shumë personel jo-thelbësor dhe familjet e tyre nga vende të ndryshme në Lindjen e Mesme. Autoritetet nuk thanë se çfarë e nxiti konkretisht këtë veprim, por një zyrtar i mbrojtjes tha se Komanda Qendrore e SHBA-së po monitoronte “tensionin në zhvillim në Lindjen e Mesme”. Trump tha se personeli po zhvendosej “sepse mund të jetë një vend i rrezikshëm dhe do të shohim se çfarë do të ndodhë”.

Të enjten, organi mbikëqyrës bërthamor i Kombeve të Bashkuara miratoi një rezolutë duke deklaruar se Irani ka shkelur detyrimet e tij për mospërhapjen e armëve bërthamore. Teherani u hakmor duke njoftuar hapjen e një qendre të re për pasurimin e uraniumit, duke paralajmëruar se “nuk kishte zgjidhje tjetër veçse të kundërpërgjigjej”.

Uraniumi është një lëndë djegëse bërthamore që, kur pasurohet shumë, mund të përdoret për të bërë një bombë. Irani pohon se programi i tij bërthamor është për qëllime paqësore.

Nga ana tjetër Trump tha se një sulm izraelit ndaj Iranit “mund të ndodhë shumë mirë” dhe paralajmëroi për një “konflikt masiv” të mundshëm që do të zhvillohet në Lindjen e Mesme “së shpejti”.

Të premten, Izraeli goditi. Sulmet goditën dhjetëra vende në të gjithë Iranin, duke synuar programin bërthamor dhe aftësitë e tij të raketave me rreze të gjatë veprimi, sipas një zyrtari ushtarak izraelit dhe një burimi ushtarak izraelit. “Ky nuk është një sulm njëditor”, tha një burim ushtarak për CNN.

Irani dhe SHBA-të ishin planifikuar të zhvillonin këtë fundjavë bisedime mbi programin bërthamor të Teheranit të dielën në Oman, raundi i fundit në disa raunde negociatash. Nuk është e qartë se çfarë do të ndodhë me këto bisedime tani.

LEXONI GJITHASHTU:

• Kush ishte Hossein Salami, komandanti i vrarë në sulmin e Izraelit ndaj Iranit
• Izraeli apo Irani? Kush ka ushtrinë më të fortë në rast të një lufte “kokë më kokë”