Sulmohet me gurë autobusi pas ndeshjes së basketbollit në Itali, vdes shoferi

Një person u vra kur persona të panjohur sulmuan një autobus me tifozë të ekipit italian të basketbollit Pistoia, dhe kërkimi për autorët është duke u zhvilluar, raportuan sot mediat italiane.

Një shofer autobusi 65-vjeçar u vra kur u godit nga një tullë që u hodh drejt automjetit, raportoi TV Rai.

Incidenti ndodhi mbrëmë në autostradën midis qyteteve Rieti dhe Terni, pas ndeshjes midis Estra Pistoia dhe RSR Sebastiani Rieti, kur një autobus me tifozë u qëllua me gurë dhe sende të tjera.

Tulla theu xhamin e përparmë dhe vrau njërin nga dy shoferët.

Gjatë ndeshjes, e cila u fitua nga ekipi i Pistoias, pati një konflikt midis dy grupeve të tifozëve për arsye që ende nuk janë përcaktuar.

Kryeministrja italian Giorgia Meloni e quajti sulmin ndaj autobusit të papranueshëm.

“Ky është një lajm i tmerrshëm që na ka lënë pa fjalë. Sulmi ndaj autobusit të tifozëve të Pistoias, i cili i kushtoi jetën njërit prej shoferëve i cili u godit nga një tullë, është një akt dhune i papranueshëm dhe i pakuptimtë”, shkroi Meloni në rrjetin social.

Ajo i shprehu ngushëllime “familjes së viktimës dhe mbështetje të gjithë atyre që ishin dëshmitarë okularë të kësaj tragjedie”.

“Unë besoj se ata që janë përgjegjës për këtë akt frikacak dhe kriminal do të identifikohen shpejt dhe do të dalin para drejtësisë”, shtoi Meloni.

Administrata e klubit të Pistoias deklaroi se ishte e tronditur nga sulmi ndaj autobusit me tifozët që po ktheheshin pas ndeshjes dhe i dërgoi ngushëllimet e saj familjes së shoferit që vdiq.

Kryetari i bashkisë së Rietit, Daniele Sinibaldi, e përshkroi incidentin si një akt kriminal tronditës.

“I gjithë komuniteti i Rietit e dënon këtë akt të neveritshëm, i cili nuk ka të bëjë fare me qytetin apo sportin tonë”, tha ai.

Ministri i Sportit dhe Rinisë, Andrea Abodi, gjithashtu e dënoi sulmin me fjalët më të ashpra të mundshme.

LEXONI GJITHASHTU:

• E rëndë në Itali, 23-vjeçari shqiptar vritet më thikë pranë universitetit
• Protestuesit pro-palestinezë përleshen me policinë para ndeshjes Itali-Izrael