Sveçla: Do të zbatojmë reciprocitetin nga 1 shtatori

Ministri i Punëve të Brendshme të Kosovës, Xhelal Sveçla deklaroi se më 1 shtator Kosova do t’i zbatojë pa hezitim vendimet për reciprocitet me Serbinë për targat dhe letërnjoftimet.

Ai thotë se Policia e Kosovës është e gatshme që të zbatojë këto dy vendime.

Sveçla beson se serbët e Kosovës e kanë kuptuar nevojën e zbatimit të këtyre dy vendimeve. Sipas tij ata kanë qenë viktima të propagandës serbe dhe ruse.

“Zbatimi i këtyre dy vendimeve u shty për një muaj me qëllim që qytetarët e etnisë serbe në Kosovë të informohen sa më shumë, sa më drejt për këto dy vendime. Ne dhe aleatët tanë ndërkombëtarë kishim ndjenjën se kishte një keqpërdorim të shtuar të këtyre qytetarëve duke qenë viktima të propagandave të Serbisë dhe Rusisë prandaj vlerësuam se është e nevojshme që të vazhdojmë me këto fushata vetëdijesuese,” – u shpreh ministri, shkruan Klan Kosova.

Ai thotë se “në veri tashmë kemi një situatë komplet ndryshe, të paimagjinueshme nga më herët për sa i takon sundimit të rendit dhe ligjit”.

LEXONI GJITHASHTU:

• Lajçak dhe Escobar kërkojnë shtyrjen e reciprocitetit edhe për tre muaj