Sveçla: Policia e Kosovës, e gatshme për të garantuar rendin dhe sigurinë

Ministri i Punëve të Brendshme të Kosovës, Xhelal Sveçla deklaroi se policia është e përkushtuar dhe e gatshme që të ofrojë rend dhe siguri në vend.

Përmes një postimi në rrjetet sociale, Sveçla iu u bëri thirrje qytetarëve të Kosovës për solidaritet dhe bashkëpunim me institucionet.

“Bashkëpunimi i ngushtë mes nesh, komunikimi i ndërsjellë dhe fryma e mirëkuptimit lehtësojnë zbatimin e misionit tonë. Policia e Kosovës është e përkushtuar dhe e gatshme që të ofrojë rend dhe siguri anë e mbanë Republikës së Kosovës në koordinim të ngushtë me partnerët dhe aleatët tanë ndërkombëtarë. Ligjshmëria, respektimi dhe zbatimi i vendimeve të Qeverisë së Republikës së Kosovës janë rruga e duhur dhe e vetme në mbrojtjen e frymës dhe vet institucioneve, sundimin e rendit e të ligjit dhe garantimin e sigurisë publike”, shkroi Sveçla ndër të tjera në Facebook.

Kryeministri i Kosovës, Albin Kurti ka shtyrë për 48 orë zbatimin e fazës së dytë të vendimit për riregjistrimin e makinave me targa ilegale serbe në RKS.

Kërkesën për shtyrje 48-orëshe e kanë bërë Shtetet e Bashkuara të Amerikës, përmes ambasadorit amerikan në Kosovë, Jeff Hovenier.

Kjo, për t’i lejuar zyrtarët evropianë dhe ata amerikanë që të angazhohen me Kosovën dhe Serbinë për të gjetur zgjidhje për këtë çështje.

Si përgjigje ndaj kërkesës së ambasadorit amerikan, Kurti ka thënë se është i gatshëm të punojë me SHBA-në dhe BE-në për të gjetur zgjidhje në dy ditët e ardhshme.

LEXONI GJITHASHTU

• Vuçiç me serbët e Kosovës: Koha për të treguar seriozitet dhe përgjegjësi si komb
• Kosova shtyn për 48 orë masën e vendosjes së gjobave për targat
• Serbët e jugut pranojnë targat, minoriteti serb: Po trajtohemi me dy standarde