Tabaku: Qeveria dështoi në menaxhimin e dy krizave të mëdha të këtij viti, 1 mld euro rënie në GDP-në e vendit

Partia Demokratike ka akuzuar qeverinë dhe kryeministrin Edi Rama se ka dështuar në menaxhimin e dy krizave të mëdha të këtij viti, tërmeti dhe pandemia.

Ish-deputetja e Partisë Demokratike, Jorida Tabaku përmes një statusi në faqen e vet në Facebook shprehet se për shkak të keqmenaxhimit nga ana e qeverisë rezultati është 1 mld euro rënie në GDP-në e vendit dhe një krizë e madhe në ekonominë dhe rritje të papunësisë.

“INSTAT raporton se rënia ekonomike në vend për 3 mujorin e tretë është 130 mln euro ndërsa Produkti Brendshëm bruto, pra çfarë prodhon e gjithë ekonomia jonë, është kontraktuar me 3.3%. Parashikimet flasin se ekonomia do të kontraktohet për këtë vit në 7.5% të PBB-së.

Buxheti 2021 nuk është ideuar për t’i ndihmuar qytetarët. Varfëria do të rritet sikundër dhe BB e ka parashikuar duke shkuar në nivelet e 2005, pra shqiptarët do të kthehen 15 vjet pas tek të ardhurat e tyre.

Ndërkohë që në këtë kohë krize ku janë humbur nga ekonomia 1 mld euro qeveria shqiptare do të japë për PPP-të e programuara 120 mln euro duke u rritur me 40% në raport me këtë vit”, shprehet ish-deputetja demokrate.