Takimi i 11-të për MSA-në, Calavera: BE krah Shqipërisë për implementimin e reformave

Ditën e sotme u mbajt takimi i njëmbëdhjetë i përbashkët Shqipëri Bashkim Evropian, për Marrëveshjen e Stabilizim Asociimit (MSA), takim i cili u zhvillua online dhe u hap nga drejtuesja e zyrës së Komisionit Evropian për Ballkanin Perëndimor, Genoveva Ruiz Calavera.

“E nderuar që hapa takimin e 11-të të MSA-së mes BE-së dhe Shqipërisë dhe të shoh kaq shumë të mira të dalin nga të dyja palët. Ka qenë një vit i vështirë me tërmetin e vitit të shkuar dhe pandeminë, por vëmendja mbetet te rrugëtimi i reformave, BE qëndron fortë krah Shqipërisë në implementimin e tyre,” – shkroi në Twitter Calavera.

Ndër pjesëmarrësit në komunikimin online ishin edhe ambasadori i BE-së në Tiranë, Luigi Soreca dhe kryenegociatori i Shqipërisë me BE-në, Zef Mazi.

Marrëveshja e Stabilizim Asociimit është një nga dokumentet kyçe të rrugëtimit drejt anëtarësimit në BE. Ajo hyri në fuqi më 1 prill 2009, katër vite pasi qe përmbyllur procesi i negociatave, proces ky i cili zgjati dy vite dhe qe nisur në janar 2003.

Hyrja në fuqi e MSA-së ndodhi pas ratifikimit nga vendet anëtare të BE-së dhe pas miratimit nga parlamenti shqiptar.

MSA-ja përfshin katër shtylla kryesore, dialogun politik e bashkëpunimin rajonal, dispozitat për liritë e lëvizjes dhe liritë tregtare, si dhe liritë komunitare dhe bashkëpunimet për fushat me rëndësi rajonale.