Doganat e Shteteve të Bashkuara kanë nisur të mbledhin tarifën prej 10% të vendosur nga presidenti Donald Trump ndaj importeve nga shumë shtete, përfshirë Kosovën.

Vendimi për tarifën fillestare prej 10% ka nisur të zbatohet në portet detare, aeroportet dhe magazinat doganore të SHBA-së në orën 12:01 të mëngjesit (06:00, sipas kohës lokale në Kosovë).

Kosova është një nga vendet që ka marrë tarifë prej 10% për importet e saj në SHBA që nga data 2 prill.

Përfaqësues të odave ekonomike kanë paralajmëruar se kjo tarifë do të ketë ndikim të madh tek eksportuesit kosovarë, duke i bërë thirrje Qeverisë së Kosovës që të heqë tarifën prej 10% për mallrat nga SHBA-ja dhe të mbështesë bizneset kosovare të prekura nga vendimi i Trumpit.

Njoftimi i Trumpit për vendosjen e tarifave ndaj importeve nga të gjitha shtetet e botës më 2 prill tronditi tregjet globale të aksioneve.

Ndërkaq, të mërkurën do të hyjnë në fuqi tarifat më të larta reciproke të Trumpit që variojnë nga 11% deri në 50%.

Importet nga Bashkimi Evropian do të goditen me një tarifë prej 20%, ndërsa mallrat kineze do të taksohen me një tarifë prej 34%, duke e çuar në total tarifën për Kinën në 54%.

Trump ka përjashtuar nga tarifat e reja mallrat që janë subjekt i tarifave të veçanta prej 25% për arsye të sigurisë kombëtare. Këtu përfshihen çeliku dhe alumini, makinat, kamionët dhe pjesët për automjete.

Administrata amerikane ka publikuar gjithashtu një listë me mbi 1.000 kategori produktesh që janë përjashtuar nga tarifat e reja. Këtu përfshihen nafta e papërpunuar, produktet e naftës dhe importe të tjera të energjisë, barnat farmaceutike, uraniumi, titani, lëndë drusore, gjysmëpërçuesit dhe bakri.

LEXONI GJITHASHTU:

• Rikthet “lufta” tregtare, SHBA nis zbatimin e tarifës doganore prej 10%