‘Të lindur së prapthi’, Rita Petro vjen në panair me një libër të ri 

Një rrëfim autobiografik, nisur nga individualiteti i një autoreje si Rita Petro e cila nuk ka aspak frikë ta konsiderojë veten të lindur së prapthi. Ky është titulli i librit, që shkrimtarja provokuese të cilën deri më tani ishim mësuar ta shihnim në zhanrin e poezisë, sjell në një tjetër zhanër, atë të prozës.

“Në fakt kam shkruar gjithmonë poezi dhe nuk e kam menduar më dukej vetja ndonjëherë sikur nuk dija të rrëfeja, por ky libër ka shumë kohë në fakt në kokën time dhe në fillim e mendoja si poemë. Kur fillova ta shkruaja më erdhi shumë për mbarë në prozë dhe pikërisht poezia më ka ndihmuar që të nxjerr ato mbresa, ato ndjesitë që ne i mbajmë të fshehta brenda vetes t’i ndriçoj edhe ato që ne i mbajmë si sekrete brenda vetes që ne i quajmë si biseda sirtari, por që kam dashur t’i nxjerr në një bashkëbisedim timin me lexuesin”, u shpreh shkrimtarja.

E distancuar nga roli i botueses, Petro sjell për lexuesin përjetimet e një brezi, njëherazi të një vajze që nuk duket se i pëlqente të ishte një peshk që ecte me rrymën.

“Nuk e kam treguar kohën e diktaturës si një kronikë, si një ngjarje, por thjesht si mbresat e një fëmije dhe pikërisht stili i fëmijës më ka ndihmuar për të dhënë sinqeritetin dhe për ta bërë sa më interesante sepse normalisht aty është jeta ime nga fëmijë i vogël deri në maturë”, tregon Petro.

Një libër emocionues, një bashkëbisedim i Ritës me Ritën e vogël. Një takim  me absurdet e atëhershme dhe të tanishme në zbulim të vazhdueshëm të vetvetes.

LEXONI GJITHASHTU:

• Rita Petro: Entuziazmi për librin zgjat vetëm 3 ditët e fundit të panairit
• ‘Libri, produkt luksoz për kohën’, Ahmeti: S’duhet të jemi nostalgjikë