Kryetari i Aleancës për Ardhmërinë e Kosovës, Ramush Haradinaj deklaroi se zgjidhja më e mirë aktualisht, për situatën në veri të vendit, do të ishte pranimi në kohë i kërkesës së SHBA-ve, për shtyrjen e zbatimit të vendimit për targat e automjeteve.
Përmes një postimi në rrjetet sociale, Haradinaj u shpreh se në situatën aktuale, duhet të gjendet një zgjidhje, pasi mund të ketë përshkallëzim.
“Të dashur qytetarë, zgjidhja më e mirë do të ishte pranimi i kërkesës amerikane në kohë. Në situatën e krijuar tani, duhet të gjendet një zgjidhje, e cila mund të mos jetë e përkryer. Por, pa zgjidhje për gjendjen në veri të vendit, situata është keq dhe drejt eskalimit”, shkroi Haradinaj në Facebook.
Në mbledhjen e qeverisë të mërkurën, kryeministri i Kosovës, Albin Kurti dha detaje të reja për takimin e së hënës me presidentin serb, Aleksandër Vuçiç në Bruksel.
Kurti deklaroi se në tekstin e marrëveshjes kanë qenë katër paragrafë, ku është shkruar edhe për planin franko-gjerman dhe dinamizimin për marrëveshje për normalizim të marrëdhënieve.
Por, sipas Kurtit, shefi i Politikës së Jashtme të BE-së, Josep Borrell ndryshoi premisën për marrëveshje, duke u fokusuar vetëm tek ujdia për targa.
LEXONI GJITHASHTU
- ‘Shqetësuese marrëdhëniet me SHBA-të’, analisti: Kurti nuk e di se çfarë kërkon
- ’Borrell iu përshtat Serbisë’, Kurti jep detaje të reja për takimin në Bruksel
- Kryenegociatorët e Kosovës dhe Serbisë takohen sot në Bruksel për targat
