Të tronditur për vrasjen e 14-vjeçarit, flasin banorët e zonës: Ishte djalë kapedan

Vrasja me thikë e 14-vjeçarit Erald Xhejo nga fshati Zvirinë i Maliqit ka tronditur opinionin dhe banorët e zonës.

Duke folur për mediat, ata e përshkruajnë viktimën si një djalë të shkëlqyer, të edukuar dhe me sjellje shembullore.

“Ishte djalë kapedan,” – tha një banor, i prekur nga ngjarja, duke shtuar se viktima ishte në moshën e nipit të tij. “Çfarë të them më tepër… Jam shumë i tronditur.”

Një tjetër banor tha se e njihte mirë familjen dhe nuk e priste një tragjedi të tillë.

“Familjen e njoh, janë të rregullt. Djali ishte i shkëlqyer, kalonte në rrugë dhe të respektonte gjithmonë. Se si ndodhi kjo… të lë pa fjalë.”

E tronditur nga lajmi, një tjetër banore tha se sapo kishte marrë vesh për ngjarjen nga djali i saj në Itali dhe po shkonte për ngushëllime.

“Nuk dinim gjë… sot më mori djali nga Italia. Tani do të shkoj te familja, jemi miq. Na ka tronditur shumë.”

Ngjarja e rëndë ndodhi në ambientet e një lokali në fshatin Pirg, ku 14-vjeçari humbi jetën si pasojë e një goditjeje me thikë nga një bashkëmoshatar i tij.

Autori i dyshuar u arrestua së bashku me babain, xhaxhain, një 34-vjeçar, si edhe katër të mitur të tjerë që ndodheshin në vendngjarje.

Ndaj të miturit rëndon akuza e vrasjes me dashje dhe drejtimit të mjetit në mënyrë të parregullt.

Banorët në lot për 14 vjeçarin e vr*rë: Djalë kapedan! pic.twitter.com/kuwEk1J8AD

— Euronews Albania (@EuronewsAlbania) August 15, 2025

LEXONI GJITHASHTU:

• Arrestohen 8 persona për vrasjen e 14-vjeçarit në Maliq, policia tregon rolin e tyre
• Ngjarja në Maliq/ Zbulohet shkaku i sherrit që çoi në vdekjen e 14-vjeçarit