Teknologjia në shërbim të komunitetit, ide të reja nga nxënësit

Ndërsa shpesh shkollat shihen si vende të konflikteve ose keqpërdorimit të teknologjisë, ekziston edhe një tjetër realitet: nxënës që përdorin teknologjinë për të krijuar projekte që kontribuojnë në komunitet.

Ky fakt u vërtetua në festivalin e përvitshëm të shkencës, ku nxënësit e gjimnazeve të Pogradec prezantuan ide inovative që prekin fusha të ndryshme: mbrojtjen e mjedisit, konceptin e shkollave inteligjente, sisteme paralajmëruese për tërmete, apo aplikacione të dedikuara për fëmijët me spektër autizmi.

Nxënësit ndanë disa nga projektet e tyre:

“Ky projekt synon të japë një zgjidhje të qëndrueshme për ndotjen e Liqenit të Ohri. Lumi i Verdovës ndot ujërat e liqenit me 25–50 ton inerte në vit. Synojmë të zbatojmë projektin në të gjithë liqenin, jo vetëm në grykëderdhje.”

“Puna jonë monitoron intensitetin e dritës, temperaturën dhe sigurinë. Sistemi automatik i ndriçimit kursen energji, ndërsa aplikacioni që krijuam për shkollën na lejon të kontrollojmë mungesat dhe të menaxhojmë burimet.”

“Projekti ynë fokusohet në reduktimin e metalet e rënda dhe përdorimin e tyre në mënyra të ndryshme. Në fshatin Bucimas ky projekt mund të jetë i dobishëm, pasi ka hapësira të gjëra për kultivimin e bimëve.”

“Synojmë të ndihmojmë familjet me fëmijë me autism, duke ofruar informim, lojëra edukative dhe aktivitete që rrisin progresin e fëmijëve. Qëllimi është më shumë sesa një orë terapi – është përmirësimi i cilësisë së jetës së tyre.”

Në një kohë kur lajmet për mënyrën se si adoleshentët rriten shpesh nuk janë pozitive, ky konkurs i ideve shkencore tregon se kur të rinjtë mbështeten, ata mund të sjellin ndryshime të prekshme dhe të rëndësishme për komunitetin.