Tensione në Kuvend/ Çuçi: Pas verifikimeve, Kryeministri e hoqi këshilltarin rumun

Kryetarja e Kuvendit rrëzoi në nisje të seancës plenare këtë të enjte kërkesën e kryetarit të grupit të PD-së Gazment Bardhi për interpelancë me Ramën. Bardhi akuzon kreun e qeverisë se ka emëruar si këshilltar të jashtëm një ish-agjent sekret rumun, Florian Coldea, që sipas tij është i përfshirë në trafik ndërkombëtar droge.

Kreu i grupit parlamentar të PS, i cili kërkoi fjalën pas Gazment Bardhit, tha se tashmë Coleda nuk është më këshilltar i kryeministrit, pasi u hoq në momentin që në vendin e tij filloi procesi i hetimit për të.

“Koha kur Damir Fazlliç ulej në këshillin e sigurimit, një këshilltar i marr nga llumi i mafies sllave dhe i ulur në këshillin e sigurimit të Shqipërisë, ka kaluar. Personi për të cilin kryetari i grupit të PD, kërkoi interpelancë është një ish-zyrtar i lartë i shërbimeve inteligjente, madje me gradën gjeneral i një vendi të Bashkimit europian i cili ka udhëhequr në mënyrë profesionale procese që lidhen me luftën kundër korrupsionit dhe krimit të organizuar në Rumani.

Kryeministri shqiptar e ka marr në një moment kur nuk ishte më në pozicion. Nëse akuzohet në vendin e tij për vepra të ndryshme, ajo është një çështje e Rumanisë jo e Shqipërisë. Në momentin që kryeministri është informuar për këtë gjë nuk e ka më këshilltar. E ka larguar. Nëse ka diçka që duhej sqaruar është, a është ky akoma këshilltar i kryeministrit? Jo, që në momentin që një proces ka filluar në vendin e tij nuk është më këshilltar”,-tha Bledi Çuçi.