Tensione në Veri, sulmohen gazetarët në Zveçan

Ekipi i një televizioni lokal në Kosovë është sulmuar gjatë raportimit nga Zveçani, komunë në veri të Kosovës e banuar me shumicë serbe, bëri të ditur Asociacioni i Gazetarëve të Kosovës.

Sipas AGK-së, disa persona të maskuar kanë sulmuar me gurë makinën me të cilën po udhëtonin tre pjesëtarë të ekipit të medias në fjalë që si pasojë pësuan lëndime të lehta trupore.

“Asociacioni i Gazetarëve të Kosovës vazhdon të jetë i shqetësuar për ekipet e mediave që po raportojnë nga veriu i vendit, ndaj i bëjmë thirrje Policisë së Kosovës dhe prezencës ndërkombëtare të krijojnë kushte më të mira për ta”, thuhet në reagimin e AGK-së.

Në veri të Kosovës tensionet janë rritur që nga 26 maji, kur kryetarët shqiptarë të komunave Zveçan, Zubin Potok dhe Leposaviç, hynë në objektet komunale për të marrë detyrën, pavarësisht rezistencës së banorëve lokalë.

LEXONI GJITHASHTU:

• Arrestohet organizatori i sulmeve ndaj KFOR-it në Veri, plagosen 3 policë
• Sirena alarmi dhe të shtëna armësh në Mitrovicën e Veriut