Tentativë për të vrarë Presidetin e Ekuadorit, sulmohet me gurë makina e tij

Presidenti i Ekuadorit, Daniel Noboa, ka shpëtuar pa lëndime pas një sulmi të ndodhur ndaj kortezhit të tij në një qytet rural të vendit, pasditen e së martës. Ngjarja, e cila është cilësuar nga autoritetet si një tentativë për atentat ndaj kreut të shtetit, ka ngritur alarmin për rritjen e tensioneve politike në vendin e Amerikës Latine.

Pamjet e publikuara në rrjetet sociale dhe nga mediat lokale tregojnë protestues që hedhin gurë drejt automjeteve të kortezhit presidencial, duke thyer xhama dhe shkaktuar dëme ndërsa automjetet përpiqeshin të largoheshin me shpejtësi nga zona.

Sipas njoftimit zyrtar të qeverisë, pesë persona janë vënë në pranga në lidhje me incidentin, ndërkohë që në njërën nga makinat e kortezhit janë gjetur shenja që sugjerojnë dëmtime nga plumbat.

Ngjarja vjen në një periudhë të tensionuar për Ekuadorin, i cili po përballet me krizë politike dhe një valë të re trazirash sociale. Presidenti Noboa, i cili ka ndërmarrë një linjë të ashpër ndaj krimit të organizuar dhe korrupsionit, ka qenë më herët në qendër të polemikave dhe kërcënimeve ndaj jetës së tij.

LEXONI GJITHASHTU:

• Tentuan të vrisnin presidentin, arrestohen 5 persona në Ekuador
• Trump u shpall luftë karteleve të drogës, bastisja në Ekuador bashkëpunim me SHBA-n