Policia kufitare në portin e Durrësit ka goditur dy raste të tentativës për të kaluar produkte kontrabandë dhe para të padeklaruara në vendin tonë. Në pranga është vënë një person ndërsa janë  proceduar penalisht 3 të tjerë.

Nga kontrolli i ushtruar në një autobus u gjetën 120 shishe me pije alkoolike dhe produkte të tjera kontrabandë ndërsa në një automjet u gjetën 20 000 euro të padeklaruara.

U arrestua në flagrancë shtetasi E. P., 36 vjeç, si dhe u referuan materialet në Prokurori, ku nisi procedimi në gjendje të lirë për shtetasin I. G., 55 vjeç, të dy banues në Shkodër. Nga kontrolli në autobusin në pronësi të drejtuesit 36-vjeçar, që kishte drejtues të dytë alternativ, shtetasin I. G., u gjetën dhe u sekuestruan në cilësinë e provës materiale, 120 shishe me pije alkoolike dhe produkte të tjera, të dyshuara të kontrabanduara.

U referuan materialet në Prokurori, ku nisën procedimet në gjendje të lirë për shtetasit A. R., 50 vjeç dhe E. H., 35 vjeç, të dy banues në Durrës. Nga kontrolli në automjetin fuoristrade tip “Nissan” që drejtonte shtetasi A. R. dhe ku ishte pasagjer 35-vjeçari, në një hapësirë të përshtatur nën kroskot, u gjetën dhe u sekuestruan në cilësinë e provës materiale, 20 000 euro të padeklaruara konform ligjeve në fuqi.

LEXONI GJITHASHTU:

• Tregtonte puro kontrabandë dhe fshihte të ardhurat, arrestohet i riu në Tiranë
• Ministri Balla: Policia të ketë në fokus krimet ekonomike, evazionin e kontrabandën