Tepelenë, meshë përshpirtjeje në vendin e vuajtjeve të kundërshtarëve të diktaturës

Në prani të autoriteteve më të larta të Kishës Katolike të Shqipërisë, në ish-Kampin e Internimit të kundërshtarëve të regjimit komunist në Tepelenë u zhvillua një meshë përshpirtjeje.

Ky kamp është cilësuar si “Aushvici shqiptar” ndërsa meshën përkujtimore e drejtoi Ipeshkëv i Sapës, Imzot Simon Kulli, një prej meshtarëve të shuguruar 25 vjet më parë me ringritjen e Kishës Katolike Shqiptare.

“Në perspektivën e mosharresës, kujtimit si domosdoshmëri shoqërore dhe kombëtare, Kisha Katolike u mblodh në këtë vend, sot në këtë ditë të veçantë në kalendarin e saj që i kushtohet shenjtërimit të meshtarëve, pikërisht për të kujtuar të gjithë ata viktima që vuajtën, u vranë, por edhe që qëndruan të palëkundur në mbrojtje të dinjitetit dhe lirisë njerëzore.”, tha Dom Mark Pashka, zëdhënës i Ipeshkvisë Shkodër.

Kampi i internimit në Tepelenë ka funksionuar në vitet 1949-1954, ndërsa numri i të internuarve vlerësohet të ketë qenë rreth 6 mijë individë nga familjet antikomuniste.

“Sigurisht, prania e mbarë Kishës, të meshtarëve dhe ipeshkëve sot në Tepelenë është shumë e domosdoshme, është domethënëse pikërisht për të na kujtuar rezistencën dhe qëndrimin e gjithë atyre që luftuan për liri dhe jetuan për liri, gjithashtu edhe domosdoshmërinë e mosharresës dhe një kujtese të shëndoshë shoqërore.”, theksoi Dom Mark Pashka.

Tashmë është publikuar projekti për ngritjen në mjediset e kampit të një muzeu në përkujtim të atyre që vuajtën apo humbën jetën si kundërshtarë të diktaturës komuniste.

LEXONI GJITHASHTU:

• Një fundjavë me kulturën e Ulqinit, Gjirokastra gjallërohet me folklor dhe ekspozita
• Nis Festivali Ndërkombëtar i Muzikës dhe Valleve, 400 artistë nga Evropa në Durrës