Thatësira në Itali, situata më e rëndë në 70 vjet

Italia vazhdon të përjetojë thatësirën më të keqe në 70 vjet, me shirat që janë përgjysmuar krahasuar me mesataren e 30 viteve të fundit. Mungesa e ujit nuk është e pazakontë në vend, por zakonisht prek qendrën dhe jugun e tij.

Sidoqoftë, këtë vit në pjesën veriore të Italisë dimri dhe shirat e pranverës ishin rreth 60% më pak se mesatarja e sipërpërmendur, sipas shifrave të Këshillit Kombëtar të Kërkimeve. Por kjo nuk është e vetmja arsye për mungesën e ujit.

 “Është si stuhia e përsosur. 70% borë më pak në dimër, 4 muaj pa shira dhe temperatura 3 deri në 4 gradë Celsius më të larta se mesatarja. Vera nuk ka filluar ende, por jemi njësoj si në mes ose në fund të korrikut,” – u shpreh Meuccio Berselli, sekretar i përgjithshëm i Autoritetit të Lumit Po.

Zona e gjerë që rrethon lumin Po, më i madhi në Itali, është më e prekura. Sektori i agrikulturës po paguan çmimin më të lartë.

 “Situata aktuale është dramatike. Po përjetojmë emergjencën më serioze në 70 vjet në provincën e Parmës dhe në tërë rajonin. Nëse gjërat nuk ndryshojnë, me zor do të furnizojmë vaditjet, sikurse po përpiqemi të bëjmë këto ditë,” – tha Francesca Mantelli, presidente e Konsorciumit të Agrikulturës, Parma.

Por jo vetëm Emilia Romanja po vuan. Rajoni i Lombardisë e ka shpallur tashmë gjendjen e emergjencës, që në fund të korrikut mund të zgjerohet në tërë vendin.