Thirrja e ministres Kumbaro: Mbeturinat të ndahen në momentin që hidhen

Mbetjet duhet të ndahen që në momentin që hidhen në letra, plastikë, qelq apo mbetje të ndryshme.

Ky është përfundimi që nxjerr ministrja e Mjedisit dhe Turizmit Mirela Kumbaro në mënyrë që të përmirësohet gjendja e ambientit ku jetojmë dhe cilësia e ajrit.

Kumbaro tregoi se në ligjin e menaxhimit të mbetjes që prej 2011 është shkruar se mbetjet duhet të ndahen, në mënyrë që më pas të riciklohen më lehtësisht.

Sipas saj, gabimi më i madh në qeverisje për 30 vite me radhë janë pikërisht mbetjet sepse nuk janë një problem që ndodh vetëm një herë. Njerëzit konsumojnë dhe prodhojnë çdo ditë prandaj është e nevojshme që t’i klasifikojnë mbeturinat që në momentin që i hedhin në kosh.

“Kjo është bërë vetëm me aksione, vetëm me fotografi Facebook-u, por asnjëherë nuk është kthyer në sistem,” – tha ajo.

Kumbaro theksoi se nëse personi që ndot nuk bëhet pjesë e procesit të pastrimit, problemi i ndotjes nuk ka për t’u zgjidhur ndonjëherë.