Tifozi argjentinas në fan zonën e Tiranës: Luajmë me gjak për fanellën, besoj te Messi dhe Martinez

Gazetarja e Euronews, Elidona Aga, ishte në një lidhje live për emisionin “Review” me Greta Topjanën nga fan zona në Tiranë, ku shumë qytetarë po ndiqnin finalen e madhe të Botërorit mes Argjentinës dhe Spanjës. Atmosfera ishte festive, me mbështetës të shumtë që kishin zgjedhur ta përjetonin së bashku sfidën më të rëndësishme të futbollit botëror.

Në intervistën e saj, një tifoz argjentinas foli për emocionet e finales, parashikimin e tij për rezultatin dhe arsyet pse besonte te triumfi i Argjentinës. Ai u shpreh se skuadra e tij mbështetet te karakteri, sakrifica dhe lideri i saj, Lionel Messi.

“Atmofsera është më shumë se e bukur në fan zonë. Nuk di nëse do të kishte një plan më të bukur se kaq. Jam shumë i lumtur dhe krenar që po e shoh ndeshjen këtu me miq shumë të mirë dhe me Euronews”, tha ai.

Për rezultatin e finales, tifozi tha se parashikonte një fitore të Argjentinës me gol të Lautaro Martinez.

“Në parashikimin tim kam parë një ëndërr të lezetshme. Unë them 1-0, me gol të Lautaro Martinez”, u shpreh ai.

Duke shpjeguar pse e shihte Argjentinën favorite, ai tha se skuadra e drejtuar nga Lionel Messi ka një forcë të madhe karakteri dhe luan me shumë përkushtim për fanellën kombëtare.

“Këtu shoh dy skuadra shumë të forta. Unë favorizoj Argjentinën te pjesa e karakterit dhe e atletizmit. Ata duan shumë kombin e tyre, luajnë me gjak për kombin e vet. Ndërsa Spanja ka atë lojën e rrjedhshme dhe të bukur, që e bën shumë të rrezikshme për Argjentinën”, tha tifozi.

Në rast se finalja do të vendosej nga penalltitë, tifozi u shpreh se besonte te aftësitë e portierit argjentinas Emiliano Martinez.

“Duke parë dy portierët, si të Spanjës ashtu edhe të Argjentinës, anoj pak nga kombëtarja ime e zemrës dhe aftësitë e Martinez”, tha ai.