Tirana Prishtina, Shkupi në postera, festivali mbledh artistë nga 25 vende

Edicioni i 4-t i Festivalit Ndërkombëtar të Posterit “Prishtina 2024” vjen në Tiranë me ekspozitën e tij.

Punimet të dizanjerëve nga 25 shtete të botës u ekspozuan mbrëmjen e të hënës në galerinë FAB pranë Universitetit të Arteve në Tiranë.

Ekspozita e kuruar nga profesor Keith Kitz, nga Massachusetts trajton temën “Harmonia”, ku posterat janë punuar nga 25 krijues.

Gjithashtu ky edicion pati si temë të dytë “Eksploro qytetet: Tirana, Prishtina, Shkupi”, ku në fokusështë jeta dhe ngjarjet e përditshme në këto 3 vende.

Gjatë prezantimit të veprave u ndanë edhe tre çmimet kryesore të festivalit, si dhe 2 çmime speciale. Halil Xhafa ishte fituesi i çmimit të parë, ndërsa Ivan Kashlakov është fitues i çmimit të tretë. 

Ky festival ku u prezantuan 100 postera është i vetmi në rajon që i kushtohet posterit dhe i mirëpret këto krijime nga e gjitha bota e që më pas vlerësohen nga një juri ndërkombëtare.

Deri tani Festivali Ndërkombëtar i Posterit në Prishtinë ka trajtuar edhe tema si “All against Corruption”, “Freedom”, “Emigrimi”.

Ekspozita në galerinë FAB do të qëndrojë e çelur deri më 12 janar.

LEXONI GJITHASHTU:

• “Tirana u çlirua për 3 orë”, Berisha falenderon protestuesit e opozitës
• “Jo të dobët dhe të ulët para Trump”, fjalimi i Macron: Duhet të na respektojë