Trafikonin ukrainas për t’i përdorur si shpërndarës droge, 4 të arrestuar

Policia e Vlorës ka finalizuar operacionin “Transnacional” ku u goditën dy raste të trafikimit të personave nga Ukraina. Policia arrestoi 4 shtetas të huaj të cilët dyshohet se në vende të ndryshme të Europës rekrutonin ukrainas të cilët i sillnin në Shqipëri, ku u mbanin dokumentat e udhëtimit dhe i shfrytëzonin për të kryer veprimtari të kundërligjshme ndërsa u shoqëruan 19 persona të moshave nga 18 deri në 26 vjeç, të cilët kanë qenë viktima të kësaj veprimtarie kriminale.

Personat e trafikuar detyroheshin përmes kërcënimeve dhe përdorimit të dhunës fizike dhe psikologjike, për t’u angazhuar në marketingun e rekrutimit të individëve të tjerë në vendet e Europës, duke përdorur platforma të ndryshme të rrjeteve sociale, me qëllimin për t’i shfrytëzuar më pas për veprimtari kriminale, si shpërndarja dhe trafikimi i lëndëve narkotike, që kryheshin gjithashtu në vendet europiane.

Gjatë operacionit u arrestuan në flagrancë për veprat penale “Trafikimi i personave të rritur”, kryer në bashkëpunim dhe “Kanosja”, 4 shtetas të huaj konkretisht:

* M. P., 27 vjeç, lindur dhe banues në Harkov, Ukrainë;

* N. K., 23 vjeç, lindur dhe banues në Kiev, Ukrainë;

* O. T., 24 vjeç, lindur dhe banues në Minsk, Bjellorusi;

* M. S., 22 vjeçe, lindur dhe banuese në Kiev, Ukrainë.

Si dhe u shpall në kërkim shtetasi K. M., 35 vjeç, banues në Poloni.

Gjatë operacionit u sekuestruan 18 laptopë, 23 pasaporta udhëtimi, 4 karta ID dhe 23 aparate celularë, të cilat do t’i nënshtrohen ekzaminimeve të mëtejshme laboratorike në Institutin e Policisë Shkencore në Tiranë.

Policia e Vlorë kishte dhe një falënderim për Ambasadën e Ukrainës në Shqipëri për mbështetjen e dhënë dhe bashkëpunimin e ngushtë me autoritetet tona në operacionin “TRANSNACIONAL”.

LEXONI GJITHASHTU:

• 14 vjeç me pistoletë e fishekë në Vlorë, nuk dihet kush ja dha armën të miturit
• Ushtronin prostitucion në Vlorë, nis hetimi ndaj 4 shtetaseve të huaja