Trafikonte emigrantë me skaf drejt Italisë, ekstradohet nga Gjeorgjia shtetasi turk

Policia e Shtetit ka mundur të ekstradojë nga Gjeorgjia në Shqipëri një shtetas turk i cili është shpallur në kërkim ndërkombëtar nga Prokuroria e Posaçme.

Në pranga ka përfunduar shtetasi Yalcin Hanci. Ai akuzohet nga GjKKO-ja, se gjatë periudhës 2020-2021, ka qenë pjesëtar i një grupi të strukturuar kriminal që ilegalisht transportonte emigrantë, kryesisht në Itali, me skaf.

Shtetasi turk mbërriti në Rinas mëngjesin e kësaj të marte, ku do të dërgohet në ambientet e vuajtjes së dënimit në pritje të gjykimit nga Gjykata Speciale.

“Si rezultat i koordinimit të veprimeve me homologët në Gjeorgji, Interpol Tirana finalizoi procedurën për ekstradimin në Shqipëri, të shtetasit turk, të kërkuar ndërkombëtarisht, Y. H., 50 vjeç.

Në vitin 2022, Gjykata e Posaçme e Shkallës së Parë për Korrupsionin dhe Krimin e Organizuar i ka caktuar 50-vjeçarit, masën e sigurisë “Arrest në burg”, për veprën penale “Ndihma për kalim të paligjshëm të kufijve”, kryer në kuadër të grupit të strukturuar kriminal.

Shtetasi Y. H. akuzohet se gjatë periudhës 23.04.2020-01.10.2021, në bashkëpunim me shtetas të tjerë dhe me qëllim përfitimin, ka transportuar ilegalisht, në Itali, me skaf, por dhe në shtete të tjera të Bashkimit Europian, emigrantë nga Siria, Egjipti dhe Irani”, njofton policia

LEXONI GJITHASHTU:

• Emri| Qëlloi me armë zjarri drejt 2 policëve, ekstradohet nga Parisi 37 vjeçari
• EMRI| Tentoi të vriste 2 policë në Vlorë, ekstradohet nga Belgjika 39-vjeçari